سر شهرة اليوتيوبرز

لما ندخول على  الفيسبوك بنصدف مقاطع فيديو او بوستات سخيفة وبلا معنى بتطلع بوشنا من دون ما نكون متابعين هالاشخاص يلي عم ينشر متل هيك بوستات ما بتعجبنا و منستغرب من عدد اللايكات والكومنتات الخيالي يلي بكون على بوست  بلا قيمة حقيقية بشدنا الفضول لندخول نشوف ليش هالشخص عندو هالعدد من المتابعين ولنشوف شو عم يقدم بلكي عندو شي مهم اكتر من هالبوست او الفيديو يلي طلع بوشنا .

منحضر دقيقة دقيقتين من فيديو تاني و تالت لنشوف شو يلي عم يقدموا هالشخص حتى وصل لهل العدد الخيالي من المتابعين و الكومنتات و الاعجابات ما منلاقي شي عليه القيمة , يمكن تستفزنا شهرة متل هيك أشخاص بالوقت يلي في كتير أشخاص موهوبين عم يقدموا شي مفيد بتلاقيهون عم يتعبوا على التحضير ليصلوا لاكبر عدد من المشاهدين او المتابعين بس للأسف مو مشهورين 

بعد ما يستفزنا هالمحتوى السيء منروح على أي بوست بيطلع بوشنا منحط تعليق سلبي او ممكن شتيمة و منطلع من هالصفحة .

هيك منكون ساهمنا من دون ما نحس بشهرة هالشخص فالبوست يلي علقنا عليه تعليق سلبي رح يظهر على  الصفحة الرئيسية عند أصدقائنا متل ما طلع عنا وبيشدهن الفضول كمان وبيدخلوا على هالصفحة وبعلقوا تعليق سلبي و بيطلعوا . 

بهالطريقة بكون هالشخص صاحب البوستات التافهة وصل لأصدقاء اصدقائك و وصل للالف الناس عن طريق تعليق صغير علقته على صفحتو و بهالحالة انت عملتلوا دعاية مجانية ليصل لاكبر عدد من الناس بمحتوى فارغ مجانا بوقت في ناس ممكن تدفع الاف الدولارات كاعلانات ليصلوا لاكبرعدد ممكن من المتابعين

رح تسأل حالك طيب كيف انشهروا هالاشخاص من البداية ؟ 

بسيطة انا بقلك غالبا هالاشخاص بتعتمد على مبدأ التسويق السلبي يلي هو مثلا نشر البوستات او الفيديوهات الأولى ذو محتوى مستفز و بتمس قضايا حساسة او مو متعودة الناس تسمع فيها من قبل او بتكون جريئا جدا لحد الوقاحة وبتبدا هالناس حملة التعليقات السلبية ضد هالشخص يلي عم يحكي بهالمواضيع المستفزة غالبا رح تكون هالتعليقات ناقدة بشكل حاد لهل الشخص و اكترها رح يكون شتائم وبتلاحظوا كيف انو صاحب هالصفحة ما بيحذف هالتعليقات الجارحة و المهينة و بيتركها لانها دعاية مجانية وكل مازادت التعليقات شو ما كانت هالتعليقات رح تزيد شهرتوا و تكبر صفحتوا .

بس يصل هالشخص لعدد لابأس فيه من المتابعين بينتقل لنوع جديد من الفيديوهات او البوستات يلي هي المسخرة على ناس تانية ممكن تكون اقل حظ و ذكاء منه حاولت تنشهراو حتى ممكن ما قدمت شي لعامة الناس مثل واحد مثلا عم يغني بطريقة مضحكة بجلسة رفقات صوره حدا من رفقاته وصار يتداول هالفيديو على الواتس و غيره ليصل لأيد بطل السوشال ميديا يلي بدو شي من الله ليعمل عنه فيديو وطبعا لانو مشهور و عندو متابعين كتار صار فيو يتنمر على  أي حدا من دون أي روادع .

بس من سوء حظ هالشخص انو مو كل يوم رح يقدر يصل لهيك نوع من الفيديوهات شو بدو يعمل ؟؟ لازم يقدم شي والا بينطفي  نجمه وبتروح شهرتو شو بدو يعمل ؟

بعد ما جمع هالعدد من المتابعين عميان القلب و قليلي الذوق ما عد يهموا شو نوع المحتوى يلي بدو يقدموه لانو شو ما قدم في مين يتابع

ممكن  بيبدا بوستات عن حياته اليومية و عن قضايا كبيرة دينية او اجتماعية او أي شي , مو مهم المهم يضل ينشر و ما يوقف

كيف انشهروا ؟

نحن يلي شهرناهن ...

م . ح